«АстраЗенека» халықаралық биофармацевтикалық компаниясының Қазақстандағы бас директоры болып Елена Трогова тағайындалды. Ол елдегі бизнесті одан әрі дамытуға, денсаулық сақтау саласы өкілдерімен ынтымақтастықты кеңейтуге және пациенттердің инновациялық терапияға қолжетімділігін арттыруға жауапты болады.
Елена Трогованың фармацевтика саласындағы тәжірибесі зор. Ол бизнестің қарқынды өсуі кезінде де, операциялық шектеулер кезеңдерінде де сәтті қызмет атқарған. Қазіргі тағайындалуына дейін Елена Ресейдегі «АстраЗенека» компаниясының иммунология бөлімін басқарып, компанияның негізгі дәрі-дәрмектерін сатуын және маркетингті дамытты.
Бұған дейін Елена Eli Lilly компаниясында эндокринология, урология, бөлшек сауда, көп арналы дамыту және сауда маркетингін басқарып, бірнеше басшылық лауазымдарды атқарды. Елена Трогованың терең кәсіби тәжірибесі оған Қазақстандағы бизнесті тиімді түрде кеңейтуге мүмкіндік береді деп күтілуде.
«Мен қазақстандық «АстраЗенека» ұжымына қосылғаныма қуаныштымын. Қазақстан өз денсаулық жүйесін белсенді түрде дамытып, заманауи медициналық шешімдерді енгізуге баса назар аударып келеді. Командамен бірлесіп, біз инновациялық терапияны пациенттер үшін қолжетімді ету және ғылыми жетістіктерді клиникалық тәжірибеге тезірек енгізу үшін жұмыс істейтін боламыз», - деді «АстраЗенека» Қазақстан компаниясының бас директоры Елена Трогова.
Айта кету керек, бұрын компанияның Қазақстандағы бас директоры қызметін атқарған Мария Шипулева «АстраЗенека» компаниясының Оңтүстік Конус аймағының президенті ретінде жаңа жаһандық рөлге ие болды. Ол Аргентина, Чили, Боливия, Парагвай және Уругвай елдерінде компанияны басқарады. Мария Аргентинаның Буэнос-Айрес қаласында қызмет атқарады.
Мария «АстраЗенека» Қазақстан компаниясында жұмыс істеген кезінде ауқымды бизнес трансформациясын басқарды. Оның басшылығымен елде жауапкершілігі шектеулі серіктестік құрылып, инновациялық дәрі-дәрмектер өндірісін жергіліктендіру жобалары жүзеге асырылды.