- Visa Global Travel Intentions Study жаһандық зерттеуінің деректері бойынша, саяхатшылардың 74%-ы цифрлық әмиянды сапардың міндетті атрибуты деп санайды
- Шопинг – шетелдегі шығынның басты бабы: шығынның 21%-ы осыған кетеді, ал тұруға – 11%, мейрамханаларға – 11%.
- БАӘ, Франция және Италияда Қазақстаннан барған Visa карталарын ұстаушылар күніне үйдегіден 3–4 есе көп жұмсайды.
- Шетелдік сапарға кететін шығынның 65%-ы сапарға шыққанға дейінгі кезеңге тиесілі
Алматы, 2026 жылғы 20 қазан – Цифрлық төлемдер индустриясының әлемдік көшбасшысы Visa компаниясы Қазақстанның шығу туризміне арналған зерттеуін ұсынды. Зерттеу Visa-ның 2022–2025 жылдардағы жиынтық транзакциялық деректеріне және салалық ашық деректерге негізделген. Онда қазақстандықтардың қайда және қашан саяхаттайтыны, шетелде неге жұмсайтыны, сондай-ақ ұлттық мерекелер мен ірі халықаралық оқиғалардың сұранысқа қалай әсер ететіні көрсетілген.
Шығу туризмі ел ішіндегі шығынның едәуір бөлігін қалыптастырады
Қазақстан Республикасы Ұлттық статистика бюросының деректері бойынша, 2025 жылы шығу туристері Қазақстаннан шыққан саяхатшылардың жалпы санының 13%-ын құрады, бірақ барлық туристік шығынның 42%-ын қамтамасыз етті. Орташа шығу туристі ел ішіндегі туристен 4 есе көп жұмсайды. Сонымен қатар шетелдік сапарға кететін шығынның 65%-ы сапарға шыққанға дейінгі кезеңге тиесілі: әуе билеттері, турпакеттер, сақтандыру мен виза ақысы Қазақстанда төленеді.
Саяхат географиясы кеңейіп келеді
Түркия – ең танымал бағыт болып қала береді, бірақ оның үлесі 2022–2025 жылдары шамамен төрттен біріне азайды. Өзбекстан екінші орынға көтерілді: Stat.uz деректері бойынша, 2025 жылы бұл елге 2,7 млн қазақстандық барған. Таиландқа қызығушылық артып келеді, онымен 2024 жылдан бері 90 күнге дейінгі визасыз режим қолданылады. Еуропа елдерінің үлесі шағын, бірақ тұрақты.
Әр бағыттың өзіндік маусымдық ерекшелігі бар. БАӘ мен Таиланд қыста да ағынды сақтап отыр: қаңтарда БАӘ-де жыл бойы осы елде болған барлық қазақстандық карталардың 52%-ы, ал Таиландта 76%-ы белсенді болды. Грузия мен Қырғызстан – шыңы шілдеге келетін жазғы бағыттар. Өзбекстан – жыл бойы ағыны біркелкі болатын жалғыз бағыт, бұл іскерлік сапарлардың үлесі жоғары екенін көрсетеді.
Шетелде қазақстандықтар көбірек жұмсайды және картамен жиі төлейді
Бірқатар алыс бағыттарда бір картаға шаққандағы шығын деңгейі жоғары. БАӘ, Франция және Италияда картаның тәуліктік шығыны Қазақстандағы деңгейден 3–4 есе асады. Германия, Испания, Таиланд, Түркия, Өзбекстан және Грузияда айырмашылық 60–75%-ды құрайды. Шығынның негізгі бабы – сән және шопинг: шетелдегі барлық шығынның 21%-ы. Сонымен қатар қазақстандықтар көршілеріне қарағанда қолма-қол ақшаны сирек алады: банкоматтарға шығынның 14%-ы тиесілі, ал Өзбекстаннан барған карта ұстаушыларда бұл көрсеткіш – 18%, Қырғызстаннан барғандарда – 16%. Саяхатшылардың 74%-ы цифрлық әмиянды сапардың міндетті атрибуты деп санайды.
Мерекелер мен оқиғалар саяхат ырғағын айқындайды
Наурыз сапарға шығудың ең әмбебап себебіне айналды: мерекелік күндері талданған алты бағыттың барлығында қазақстандық карталардың белсенділігі артты, Сауд Арабиясында – 2,5 есе, Жапонияда – 1,9 есе. Ораза айт кезінде Сауд Арабиясына ағын 2,7 есе өсті, ал Республика күні Қытайдағы белсенді карталар саны екі еседен астам көбейді.
Ірі оқиғалар сұранысқа әртүрлі әсер етеді. Джастин Тимберлейктің 2025 жылғы шілдедегі Баку концерті белсенді қазақстандық карталардың санын осы маусымдағы әдеттегі деңгеймен салыстырғанда шамамен 6 есе арттырды, Тбилисиде – 2 есе. Қытайдағы Кантон жәрмеңкесінің күзгі сессиясы бір картаға күніне орташа $303 шығынмен ағынды 1,6 есе көбейтті, бұл іскерлік сатып алуларды көрсетеді. Осакадағы Экспо-2025 ұзақ мерзімді әсер етті: Жапонияға күзгі ағын жыл сайынғы есеппен 76%-ға өсті.
«Саяхат барған сайын цифрлана түсуде, ал төлемдер осы тәжірибенің маңызды бөлігі болып отыр. Қазақстандықтардың шетелде карталар мен цифрлық әмиянды белсенді пайдаланып, қолма-қол ақшасыз төлемді жиі таңдап, жаңа бағыттарды ашып жатқанын көріп отырмыз. Транзакциялық деректерді талдау саяхатшылардың әдеттері қалай өзгеретінін және өңірде де, одан тыс жерде де саяхатқа сұранысты қандай факторлар қалыптастыратынын жақсырақ түсінуге мүмкіндік береді», – деді Visa компаниясының Орталық Азиядағы вице-президенті әрі өңірлік менеджері Салима Гутиева.
Зерттеудің толық нұсқасымен осы сілтеме арқылы танысуға болады.